Davao City – Karon nga aduna na’y mamugna nga bag-ong Senate ‘supermajority,’ siguradong wala na’y makababag pa sa pagpasar sa death penalty law nga nahimong kontrobersiyal ug init nga hisgutanan sa hawanan sa Camara Baja, sa Senado ug sa mga pro ug anti-Duterte sectors sa miaging mga bulan.
Ang pagdaug sa siyam ka kandidato sa pagka-senador nga giduso sa administrasyong Duterte maghatag og kusog ingon man dakung kahigayonan aron palutson sa hawanan sa Senado ang balaud nga magbuhi pag-usab sa silot-kamatayon dinhi sa nasud.
Matud sa kanhi presidente sa Volunteers Against Crime and Corruption (PACC) ug karon Presidential-Anti-Corruption Commis-sion Chairman Dante Jimenez, upat na lang ka opposition senators ang nahibilin ug kini dili na pupaigo nga ihap aron hiusahon ang ilang puwersa diha sa pagbabag sa pagpasar sa death penalty law reimposition.
Segun ni Jimenez, katungod sa mga opposition senators ang pagpasibaw sa ilang baruganan ug makig-debate sa mga kakaubanang senador apan wala na sila’y mahimo pa sa scenario nga pagbanhaw pag-usab sa capital punishment nga giwagtang sa kapanahonan ni Pres. Gloria Macapagal-Arroyo.
Awhag pa ni Jimenez ngadto sa opposition senators nga tik-opan na lamang ang ilang mga baba ug tugtan na lamang ang death penalty revival nga gipangayo ug gisaad ni Pres. Rodrigo Duterte sa katawhan niadtong panahon sa kampanya sa 2016 Pre-sidential Election.
Samtang pikas bahin, pabor si Jimenez nga manglupad sa laing kanasuran ug manghawa na dinhi sa Pilipinas ang mga dilawan aron wala na’y magsupak-supak ug magsamok-samok pa sa kagamhanan ug sa nasud sanglit ang labing apektado sa ilang ginabuhat mao man ang katawhang Pilipino.
RadyoMaN Joel Viray
