ILOILO – Wala sang problema kay governor Arthur Defensor Sr. kon nagapanagtag karon sang mga bag si 4th district Congressman Ferjenel ‘Ferj’ Biron sa mga estudyante sa probinsya sang Iloilo.
Suno sa gobernador, mas maayo pa gid kon talaptapon ni Biron ang mga estudyante halin sa mga barangay Asluman sa pinakapunta sang Carless a Norte sang Iloilo tubtob sa banwa sang San Joaquin, sa barangay Lawigan sa Southern Iloilo.
“Waay na kaso ah, mayo na gani kon sige panghatag ya makatilaw man ang mga pigado nga kabataan sang iya manggad. Sigehon ya pa kapanghatag, dugangan ya pa gid kag talaptapon ya na lang halin sa Brgy Asluman sa punta sang Carles asta to sa baryo sa San Joaquin, sa daku bala nga baryo [Lawigan],” ang kabahin sang pahayag ni Governor Defensor sa interview sang Capitol Press Corps.
Samtang, ginpahayag sang gobernador nga ang iya lang mahatag sa mga pumuluyo amo ang gugma, tampad kag transparent nga panghimanwa.
“Gugma, Gugma nga Gugma. Pareho na bala sang ‘Build, Build, Build’ ni presidente Duterte [laughs]. Akon ya, ‘Gugma, Gugma, Gugma.’ Pero sa matuod-tuod lang, serbisyo nga matinlo, serbisyo nga hayag, serbisyo nga para sa mga pumuluyo. Amo na akon ginapanagtag.”
Nahibaluan nga lunsay nagpahayag sang interes sanday Congressman Ferj Biron kag anak ni governor Defensor nga si 3rd district Congressman Arthur ‘Toto’ Defensor nga magpapili sa pagka-gobernador sa 2019 elections.
Photo from web
