Iligan City – Paglikay sa disgrasya mao’y usa sa dakung rason sa Department of Public Works and Highways o DPWH hinungdan nga ilang gipapahawa o gipa-undang ang gapamaligya diha sa C3 road matag hapon paingon sa gabii.
Matud ni Engr. Maria David, Project Engineer sa DPWH nga delikado kaayo alang sa mga vendors ug katawhan nga gapanuroy ug gapamalit sa maong lugar tungod prone kaayo kini sa disgrasya.
Gani, sumala ni David, bisan wala pa ang mga gapamaligya kaniadtu, daghan na ang mga nadisgrasya sa maong lugar.
Gibutyag ni David nga mismong ang rehiyonal nga buhatan sa DPWH ang nisulat sa buhatan ni City Mayor Celso Regencia nga ipaundang ang pagpamaligya sa nasangpit nga lugar tungod ang dalan para lamang sa mga sakyanan ug dili aron pwestuhan ug baligya-an.
Alang sa mga vendors sa maong lugar, dakung tabang na unta sa ilang inadlaw- adlaw nga panginabuhi ang pagpamaligya sa C3 road apan sa kalit lang nahanaw gumikan sa pagpasirado sa ilang baligya-anan. (Ghiner L. Cabanday, RMN Iligan)
