DENGUE OUTBREAK | Tatlo na ka mga banwa sa Capiz ang ginpaidalom sa state of calamity, bangud sa padayun nga pagtaas sang kaso sang dengue

100

CAPIZ – Naglab-ot na sa tatlo ka mga banwa na sa probinsiya sang Capiz ang ginpaidalom sa state of calamity bangud sa padayon nga pagtaas sang kaso sang dengue. Pinakaulihi diri nga nagdeklarar ang banwa sang Sigma, pinaagi sa isa ka resolution nga gin-aprubahan sang ila nga sangguinaing bayan.


Sa interview sang DYVR RMN Roxas kay SB member Esperidion Pelaez, ginpahayag sini nga naglab-ot na sa 197 ang kaso sang dengue sa ila nga banwa, rasun nga ginpaidalum ang ini sa state of calamity agud mapunggan ang pagtaas sang mga biktima sang dengue kag mapasangkad ang ila kampanya kontra sa makamalatay nga balatian. Suno diri nga magamit na sang lokal nga gobyerno ang ila nga calamity fund agud awayon ang nasambit nga balatian.

Una na nga nagdeklarar sang state of calamity ang banwa sang Pontevedra kun sa diin nagalab-ot sa 200 ang mga biktima sang dengue kag ginsundan ini sang President Roxas nga may 156 ka mga kaso. Base sa datos sang Provincial Health Office kag Department of Health-Capiz, naglab-ot na sa masobra 4,200 ang napagkit nga kaso sang dengue sa probinsya sang Capiz humalin Enero tubtob Hulyo sa sini nga tuig kun sa diin nagtaas ini sang halos 988% kun ikumpara sang nagligad nga tuig sa kapareho nga period.

Sa madumduman nga gindeklarar ang dengue outbreak sa bug-os nga probinsiya pinaagi sa executive order ni Governor Esteban Evan ‘Nonoy’ Contreras.

Facebook Comments