Roxas City, Capiz- May yara na sang duha ka napatay bangod sa dengue sa probinsiya sang Capiz .
Suno kay PHO Information Officer Mr. Ayr Altavas, ang una nga kaso ang naghalin sa Brgy. Banica Roxas City kun sa diin ini ang nagapang-edaron sang apat ka tuig nga lalaki kag ginbawian sang kabuhi sang Hunyo 18 matapos nga gin-admit sa isa ka pribado nga ospital.
Samtang ang ikaduha, amo ang siyam ka tuig nga bata nga babaye nga naghalin sa Poblacion Norte Ivisan.
Bangod sa amo nga development, mas labi pa nila nga ginapasangkad ang kampanya kontra dengue pinaage sa community and social mobilization.
Samtang nahibaloan base sa datos sang Provincial Health Office kag Capiz Epidemiological Surveillance and Response Unit ukon CESRU, humalin lamang sang Enero 1 tubtob Hunyo 28 sini nga tuig naglab-ot na sa kabug-osan nga 222 ka kaso sang dengue ang narekord sa bilog nga probinsya sang Capiz kun sa diin 19 ang naghalin sa mga kahilapit nga probinsiya nga diri lamang ginbulong sa ospital sa Capiz.
Samtang pinakamadamo sa gihapon nga kaso ang halin sa Roxas City nga may yara sang 89, Cuartero- 5, Dao- 8, Dumalag- 6, Dumarao- 6,Ivisan- 15, Jamindan- 10, Maayon- 1, Mambusao-15, Panay- 6, Panit-an- 11, Pilar- 1, Pontevedra- 4, President Roxas- 10, Sapian- 5, Sigma- 7 kag Tapaz nga may apat ka kaso.
