Davao City – Gikumpirma karon sa Davao City Health Office (CHO) nga nakahukom ang Department of Health (DOH) nga ipailawom una sa makuting assessment ang Dengvaxia una kini ikonsidera nga subling gamiton pangbakuna alang sa katawhan kontra sa balatian nga dengue.
Matud ni CHO Head Dr. Josephine Villafuerte, mismong si Health Sec. Francisco Duque nagmando nga punggan una ang paggamit sa Dengvaxia hangtud dili pa mahuman ang medical assessment niini.
Gipasabot ni Villafuerte nga tuyo sa departamento sa maayong panglawas nga sutaon una ang safeguards ingon man efficacy sa Dengvaxia una pa kini hingpit ibakuna ngadto sa mga tawo labaw na sa mga kabataan.
Segun ni Villafuerte, bisan dinhi sa dakbayan wala pa usab sila makasugod sa baksinasyon tungod kay walay igong supply sa Dengvaxia nga gipadala ang DOH ngadto kanila.
Nasabtan ni Villafuerte nga dili na buot sa DOH nga adunay mga bata mamatay tungod sa Dengvaxia nga nahitabo sa panahon sa nakalabay’ng Aquino administration.
Nabutang sa init nga panaglalis ang multi-million Dengvaxia vaccination program human nadiskubre nga wala pa diay mahuman ang pagtuon niini apan gigamit na kini sa mga Pinoy ilawom sa Aquino Administration.
Gumikan niini, gikasuhan sa Duterte administration ang Sanofi Pasteur nga maoy tiggama sa Dengvaxia maingon man ang kanhi mga opisyal sa Aquino regime sama kang ex-Health Secretary karon Rep. Janette Garin.
Sa pagkakaron, ang mga solusyon aron mahalikay sa sakit nga dengue mao ang pagtuman sa 4 o’clock habit kun paglimpyo sa palibot ug ang pagpa-check-up sa doctor kung gihilantan na og pila na ka adlaw, dugang pasabot ni Villafuerte.
RadyoMaN Joel Viray
