Sarangani Province–Nibisita sa probinsya sa Sarangani ang usa sa mga myembro sa gabinete ni Pangulong Rodrigo Duterte pinaagi ni DENR Assistant Secretary Corazon Davis dala ang dili muubos P500 Milyones ka pesos nga kantidad sa proyekto. Gipabalo ni Asec Davis ngadto kang Governor Steve Chiongbian Solon ang maayong balita nga apil ang Sarangani Province nga maka-benipisyo sa ilang programa gitawag nga Risk Resiliency Program. Walo (8) lang ka probinsya sa tibuok Pilipinas ang maka-benipisyo sa ilang climate change project og usa na niini ang Sarangani.
Napili sa pamunuan ni Governor Solon nga pa-pondohan ang project proposal niini may kabahin sa water resources management mukantidad og P520 Milyones ka pesos, kung diin maka-benipisyo ang 82 ka barangay hilabi na kadtong nalisdan sa pagkuha og mainum nga tubig.
Sunod mga adlaw karong bulan sa Pebrero, gikatakda ang pag-presenta ni Governor Solon ngadto kang DENR Secretary Roy Cimatu didto sa kauluhang Maynila may kabahin sa kinatibuk-ang unod sa maong project proposal, kauban ang mga gobernador sa Western Samar, Negros Oriental, Masbate, Sorsogon, Dinagat Island, Surigao del Norte og Surigao del Sur.
Naghandum na lamang si DENR Assistant Secretary Davis nga adunay kalampusan sa ilang bag-ong proyekto tungod kay kahibalo man matud pa niini nga manag-susama sila sa gobernador sa Sarangani Province nga adunay pasyon sa paghatag og tinuuray nga pagserbisyo. Maayo matud pa ang padagan sa probinsya maong makalaum sila sa maayong implementasyon.
