Aminado ang Department of Education Regional Office 6 nga may epekto sa performance sang mga atleta sa probinsiya sang Iloilo sa bag-o lang natapos nga Western Visayas Regional Athletic Association (WVRAA) Meet 2019 ang kakulang sang bag-o nga kagamitan kasubong sang mga spike shoes.
Ginpahayag ni Mr. Nick Valenzuela ang Division Sports Officer sang Dep- Ed Province of Iloilo pila sa mga atleta ang nagmantinir nga maggamit sang daan nga sapatos kon sa diin daku ang epekto sa ila performance.
Gintumod ni Valenzuela ang daan nga spike shoes sang isa ka atleta nga nagadanlog- danlog bangud nipis na ang spike.
Isa man sa factor nga naka-epekto sa performance sang mga atleta sa hampang ang pagmasakit sang pila sa una nga adlaw nila sa billeting area sa Brgy. Banica, Roxas City.
Nagpangita naman sang paagi ang mga coaches kag trainors nga mabaklan sang vitamins ang mga atleta halin sa ila personal nga kuarta matapos nga wala ma- aprubahan sang Sangguniang Panlalawigan ang 2019 General Budget sang Probinsiya kon sa diin nalakip kontani ang budget para sa mga atleta.
Nagalaum naman si Valenzuela nga matigayun na nga ma- release sang temprano ang budget halin sa provincial government para sa palaabuton nga Palarong Pambansa 2019 nga hiwaton sa Davao City umpisa sa Abril 27 tubtob Mayo 4.
Sa final medal tally nagapanguna ang Negros Occidental sa elementary category nga naka-abanse sang 30 ka gold medals halin sa individual events sa athletics nga gymnastics kag swimming, sa pihak sini gindominar naman sang Iloilo ang secondary level nga abanse sang 16 ka gold medal sa Negros Occidental ilabi na sa mga major sports event sa ball games.
