Mahimo na karon makaparehistro ang mga kabataan nga luyag mag eskwela sa public schools sa masunod nga school year, 2019-2020.
Ginpahayag ni Dr. Victor De Gracia, assistant regional director sang Department of Education Region VI, nag-umpisa na sang Sabado, Enero 26, ang early registration para sa mga incoming kindergarten, grade 1, grade 7, kag grade 11 sa tanan nga mga publiko nga mga buluthuan sa syudad kag probinsya sang Iloilo.
Katuyuan sang early registration nga mabanta ang numero sang mga estudyante nga magapa-enroll sa masunod nga tuig agud malikawan ang ‘overcrowding’ sa mga buluthuan.
Para makaparehistro sa Kindergarten, kinahanglan dal-on sang ginikanan ang birth certificate sang bata. Samtang, sa magapalista sa grade 1, 7, kag 11, dal-on sang mga estudyante ang ila report card, magluwas sa ila birth certificate.
Ginpaathag sang DEP-ED nga ang pagabatunon lang sa Kindergarten amo ang kabataan nga naga-edad lima ka tuig antis mag Agosto 31.
Magalawig tubtub sa Pebrero 22 ang nasambit nga ‘early registration’.
