Aminado ang Department of Education – DEPED Malaybalay City Division nga adunay mga tulunghaan nga nagkulan sa mga lawak-saringan.
Sa interview sa RMN DXMB Malaybalay ngadto kang Assistant Schools Division Superintendent Sunny Ray Amit, gibutyag niini nga ilabina sa nakasinati ug kakulangon sa mga classrooms kadtong mga tulunghaan nga integrated schools o kadtong mga elementary nga aduna nay high school.
Gipasabot ni Amit nga lahi ang lay-out sa classrooms alang sa pang-ementarya ug sa high school maong kinahanglan nga matukuran ug bag-ong classrooms.
Gawas sa kakulangon sa lawak-saringanan, aduna usay mga kakulangon sa bangko.
Samtang gipahayag usab ni Amit nga posibleng adunay mga tulunghaan nga magpatuman ug shifting sa klase.
Hinoon giklaro niya nga masayran kini sa mga musunod nga adlaw tungod kay padayon ang enrolment.
Aminado usab ang opisyal nga adunay nagpatuman ug shifting kaniadtong nakalabay nga tuig sama sa BNHS, Malaybalay City Central Schools ug Bangcud National High School tungod sa kakulangon sa classrooms ug magtutudlo sa espesipikong subject.
