Davao City – Nanghinaut ang Department of Education kun DepEd-Davao nga daghan ang mitubag sa notice kun reminder sa maong buhatan ngadto sa mga estudyante ingon man mga magtutudlo nga karong adlawa, Enero 3, 2019 ang opisyal nga unang adlaw sa balik-eskwela karong tuiga.
Sa pakighinabi sa DXDC RMN Davao kay DepEd-Davao spokesperson Jenielito Atillo, segun niini nga importante usab ang presensya sa bata sulod sa tulunghaan sa unang adlaw gikan sa Christmas break gumikan magsugod na usab og hisgut sa mga class lessons gani opisyal usab nga i-check sa mga magtutudlo ang attendance sa ilang mga estudyante.
“Og maghisgot ta og attendance, ang presensya sa bata sa tulunghaan importante kung wala siya dinha, daghan ang mawala sa iyaha with respect sa iyang grado”, segun sa tigpamaba.
Apan dugang ni Atillo nga naghulat pa sila og assessment og daghan ba ang misulod karong adlawa gani segun niya nga og wala gayud nakasulod sa skwelahan karong adlawa, naglaum ang DepEd nga ugmang adlawa, Biyernes maka-report na ang ubang mga bata.
Kahinumduman nga nagpagula og notice ang nasangpit nga buhatan niadtong Disyembre nga opisyal magsugod ang klase sa pampublikong skwelahan karong adlawa, Enero 3, 2019 human nagpagula og memorandum ang Malacañang nga gisuspinde ang klase ingon man trabaho sa mga empleyado sa gobyerno sa Enero 2, 2019.
RadyoMan Renz Barbarona
