DepEd: Gadget usage angay i-regulate

Davao City – Gi-aghat karon sa Department of Education (DepED) Davao Region ang mga ginikanan nga kung mahimo, dili una pahawiron og gadgets ang ilang mga anak hilabi na kung wala pa kinii igong kahimatngon sa unsay anaa sa online games ug sa videos nga gitan-aw.

Matud ni Jenielito Atillo, tigpamaba sa DepEd-XI, dili maayo nga sa linghud nga pangedaron sa mga bata sayo sila ma-expose sa mga gadgets ug sa dula sa online games ug pagtan-aw sa mga video sa social site sama sa Youtube kay maghatag kini og negatibong epekto sa kinaiya ug sa ilang pagdako.

Segun ni Atillo, mas maayo gyod kung magsumikad mismo sa mga ginikanan ang mga pagpanudlo ug paggiya sa mga bata aron ini’g daku nila, mas lantip ang ilang panabot ingon man makabaton og maayong kinaiya ug mahulma ang ilang positibong lantaw sa kinabuhi.


Dismasyado si Atillo sa mga ginikanan kinsa mao pay mohatag og gadgets sa ilang gagmay’ng mga anak aron lamang muhilom ug dili magsinamok sa ilang gimbuhaton diin ang kapait pa gyod kay dili monitoron kung pila na ka oras nagbabad sa online games ug pagtan-aw sa Youtube ug uban pang online platforms ug mobile applications.

Mao kini ang gituhuang rason nganong daghan sa mga kabataan karon ubos na og panabot ug dili pa gyod maka-mao mubasa ug walay gana magtuon, walay pagtahud, maot nga kinaiya, depresyon ug ang pinakapait ang pag-suicide.

Usa sa nakaalarma karon ni Atillo, kinsa kanhi magsisibya sa DXDC 621 RMN Davao sa dekada 90 ang ‘Momo Challenge’ sa online games diin adunay 50 ka tahas ang humanon sa player apan ang problema mao nga manduan na kini nga pasakitan ang kaugalingon o dili ba kaha magsuicide aron walay dautang mahitabo sa ilang pamilya.

Sumpay pa ni Atillo nga kung dili gayud makabalibad ang mga ginikanan sa hangyo sa ilang mga anak, gikinahanglan regulated ug gina-monitor ang pagdula sa online games ug pagtan-aw sa Youtube aron dili masusama sa ubang bata sama sa Grade 7 nga nagpakamatay pinaagi sa pag-inom og kapin 20 ka tabletas human nakadula og Momo Challenge diin mimando sa bata nga magpakamatay aron walay dautang mahitabo sa iyang pamilya.

RadyoMaN Joel Viray

Facebook Comments