iFM Laoag – Nagpabaron ti langa iti Schools Division of Ilocos Norte (SDOIN) iti Records Section ken Receiving Lounge’da a masarakan iti masungad nga opisina iti division office.
Ti nadakdakamat nga opisina ket naaddaan iti moderno a set-up a makaay-ayo kadagiti umay bumisita.
Iti unegna daytoy mabalin a pagawatan kadagiti bisita ken kasta pay a mabalin nga agobra iti uneg dagiti mangisursuro ken empleyado ti DepEd. Addaan ngamin pay daytoy iti Mac Computers nu sadino mabalin nga usaren iti research ken kasta pay kadagiti dokomentos a masapol dagiti maseknan.
“Masapol nga ikkan tayo ti konsiderasion dagiti agipapaay ti serbisio iti napintas nga opisina tapnu sumaysayaat pay ti panagtrabahoda ken saan a madagsenan ti riknada kadagiti nagkaado nga maipapaobra kadakuada,” – Schools Division Superintendent Vilma D. Eda.
Mabalin pay nga aramaten dagiti school heads, mamaestra, ken office personnel ti nasao nga opisina a lugar a pagsisinukatanda iti kapanunotan maipanggep iti nagduduma a pagsayaatan ti benneg edukasyon.
Ti met naiplastar nga iMac computers ket mausar pay kadagiti nagduduma a serbisio para kadagiti kliente tapnu naalalisto iti transaksionda iti SDOIN babaen iti Data Tracking System (DTS).
Gapu kadaytoy, sumayaat iti langa iti Division Office ket mabalin pay a maipagtangsit iti kina urnosna ken kasta pay iti kinaalisto ti serbisio a maisagot kadagiti agkasapolan.
Bayat met iti kaadda dagiti bisita iti uneg ti opisina, maikkanda met iti libre a kape ken adda pay ti liblibro a mabalinda a basbasaen kabayatan iti panagurayda iti batangda.
Child-friendly pay ti nasao nga opisina gapu ta addaan pay daytoy iti “Children’s Corner” nga adda iti coloring sheets a mabalinda nga usaren iti uneg.
Gutgutigoten met ni Ms. Eda dagiti division workers nga agdonar dagiti libro ken daddumapay a reading materials a mabalin nga usaren dagiti bisbisita.
Bernard Ver, RMN News
