Davao City – Mas gitutokan sumala pa karon sa Department of Education (DepEd) ang pag ‘integrate’ sa mga leksyon nga maghatag og positibong panglantaw sa mga kabataan labi na sa pagbatok sa dili maayong hatud sa teknolohiya partikular na sa internet.
Sa pakighinabi sa DXDC RMN Davao kang Jenielito “Dodong” Atillo, DepEd-XI spokesperson, gisaysay niini nga usa kini ka lakang sa departamento aron malikay ang mga kabataan sa dili maayong epekto sa internet sama na lamang sa nag viral nga ‘Momo challenge’.
“Naa ‘tay mga lakang nga ginahimo pinaagi sa atong mga leksyon, sa atong curriculum para ma address nato ‘tong panginahanglan sa atong mga kabataan ug ilahang positibong panglantaw ma-reinforce nato,” matud niini.
Nanawagan usab ang DepEd spokesperson ngadto sa mga ginikanan nga kanunayng i-monitor ang ilang mga anak labi na sa ginakubi niining mga gadget. Dili sumala pa angayng himuong rason ang paghatag og gadget sa kabataan aron ma-libre lamang sa atensyon tungod sa trabahoon.
“Bisag wala pa nang Momo challenge pero naa na tay mga situations in the past nga nagpakita nga dili gyud maayo nga kung ang bata magtutok na lang sa gadget, dili sya mamahimong produktibo,” saysay niini.
RadyoMaN Kirby Manzon
