Davao City – Gipagula karon sa Department of Education (DepEd) ang Social Distancing Guidelines niini alang sa nahibiling mga adlaw sa School Year 2019-2020.
Subay kini sa hulga dala sa COVID-19 dinhi sa Pilipinas ingon man resulta sa gipahigayong diskusyon sa Executive Committee sa DepEd kagahapong adlawa.
Sa interbyu kang DepEd-Davao spokesperson Jenielito Atillo sa morning primetime radio social commentary program ‘Straight to the Point,’ gibutyag niini nga gimanduan karon ang tanang pampublikong tulonghaan nga ipahigayon ang 4th Quarter Examinations alang sa graduating students nga Grades 6 ug 12 karong March 12-13, 2020 samtang sa March 19-20 ang ubang grade levels.
Dugang ni Atillo nga gikinahanglang mureport ang mga estudyante sunod semana March 16-20 alang sa ialng scheduled date of exams diin ang Grades 6 ug 12 magpahigayon na sa ilang graduation practice.
Dugang sa guidelines nga human sa 4th quarter exams, himoong ‘home-based’ na lamang ang academic requirements.
Samtang sa ‘moving up’ ug ‘graduation rites,’ mo-decidir ang usa ka tulonghaan sa mga adlaw gikan April 13-17 kung kanus-a nila kini ipahigayon uban ang konsiderasyon sa mga DOH ‘guidelines on mass gatherings’ apan pwede kining i-reschedule o dili na ipahigayon pa.
Gi-awhag usab ang mga pribadong tulonghaan nga mosagop sa maong mga guidelines.
RadyoMaN Jason Amisola
