Davao City – Giklaro karon sa Department of Education kun DepEd-XI nga dili tinuod nga mandatory ang pagsuot og uniporme sa mga estudyante sa pagpatuman sa blended learning sa school year 2020-2021.
Kini ang gitino ni DepEd XI spokesperson Jenielito ‘Dodong’ Atillo atol sa interview sa Straight to the Point Morning Edition diin mikalat matud pa sa social media nga mandatory ang pagsuot og uniform sa online class.
“Dili gyud na pwedeng mahimong mandatory. I am trying to clarify this kay naay nagkunayap nga mga balita nga ang atong buhatan nagsulti nga mandatory kuno ang mga uniporme sa public schools. Di gyud na pwede,” segun ni Atillo.
Dugang sa tigpamaba, bisan ang ID dili usab mandatory.
Gisugilon niini nga gi-encourage lamang mag-uniform apan dili mandatory.
“Nahimong polisiya nga ang uniporme is not a requirement, even mga ID dili requirement. Gusto nato i-clarify nga kanang mikuyanap nga mga impormasyon nga ang DepEd XI nagsulti nga mandatory uniform, dili tinuod. Amo lang gi-encourage ang wearing of uniforms, wala gi-require ngadto sa kabataan,” dugang ni Atillo.
RadyoMaN Renz Barbarona
