Davao City – Usa ka semana human sa gipahigayong rally sa mga lumad gikan sa Salugpungan atubangan sa Department of Education (DepEd)-XI office, subling nag-rally na usab ang nahisgutan karong adlawa, Agosto 5, 2019.
Gani gipanawagan sa DepEd-XI ngadto sa Department of Social Welfare and Development (DSWD) nga mahatagan og pagtagad ang mga bata nga giapil-apil sa rally sa mga lumad.
Sa interbyu sa DXDC RMN Davao kang Jenielito “Dodong” Atillo, spokesperson sa DepEd-XI, gisaysay niini nga dili angay nga iapil sa maong mga aktibidad ang inosenteng mga kabataan.
“Kinahanglan sigurong tan-awon pud sa DSWD or CSSDO ang sitwasyon o kahimtang sa atong kabataan because we all know that children are not allowed really in the ticket line or in the rally line para duyugan ang mga katigulangan sa pagpasibaw sa ilang mga issues,” tataw ni Atillo.
Gibutyag sa DepEd-XI nga nagpahigayon na sab og rally ang mga lumad kaganinang buntag bitbit ang mga bata dungan sa ilang flag raising. Kahinumduman nga July 29, 2019 sa dihang nag rally usab ang nahisgutan atubangan sa DepEd-XI office human sa suspensyong gipahamtang sa mga eskwelahan sa Salugpungan.
RadyoMaN Kirby Manzon
