Davao City – Wala nay gihatag nga lugway ang Department of Education (DepEd) alang sa pagtubag sa Salugpungan Ta’tanu Igkanugon Learning Center Inc. (STTILCI) sa alegasyong gipahamtang kanila diin karong adlawa, July 22, 2019 ang gi-set nga deadline niini.
Sa interbyu sa DXDC RMN Davao kang Jenielito “Dodong” Atillo, spokesperson sa DepEd-XI, gibutyag niini nga kini ang panahon nga pamatud-an sa Salugpungan nga dili tinuod ang reklamong pagtulun-an batok sa gobyerno ang ginatudlo sa ilang mga estudyante.
Nasayran nga mihangyo og dugang lima ka adlaw nga lugway ang executive director sa Salugpungan diin gi-arprubahan usab kini ni DepEd-XI Regional Director, Evelyn Fetavero.
“The 5 day show cause which will end supposedly on July 17, 2019 is extended for another 5 days after RD Evelyn Fetalvero approved the request for extension of Ms. Meggie Nolasco, Salugpongan Executive Director. The new deadline which is non-extendible is on July 22, 2019,” saysay ni Atillo.
Una nang gibutyag sa DepEd-XI spokesperson nga anaa sa kamot ni DepEd Sec. Leonor Briones ang desisyon sa Salugpungan diin sila usab ang nagpakanaog sa maong direktiba subay sa report nga gipaabot sa departamento.
RadyoMaN Kirby Manzon
