South Cotabato–Gikutlo sa usa ka Adrian Labanero, hamtong ang pangidaron residente sa Purok Mabinuligon,Barangay Katipunan Sto.Niño, South Cotabato ang iyang kaugalingong kinabuhi pinaagi sa pagdunggab sa iyang dughan gamit ang kutsilyo pasado alas 2:00 sa buntag sa ilaha mismong panimalay.
Sumala pa ni Police Captain Sherwin Panaguiton ang labaw sa Sto Niño Police Station nga nakadawat sila ug tawag gikan sa Brgy.Opisyal sa Katipunan kalabutan sa panghitabo ug gilayon kining girespondihan sa iyang mga sakop ang lugar ug didto ilang naabtan ang nasampit nga naligo na sa iyang kaugalingong likido nga wala nay kinabuhi.
Saysay man usab sa opisyal nga depresyon ang hinungdan sa pagpakamatay sa nasampit gumikan kay duna kini sakit nga cancer sa bukog nga dugay na niining gihambin gani putol na ang usa ka tiil tungod sa maong sakit.
Pagpaklaro ni Panaguiton nga misamot nag pagkadepress sa nasampit gumikan kay gibiyaaan kini sa iyang mga ginikanan ug miuli ngadto sa Iloilo inay nga tabangan kini ug usa pa gibiyaan usab kini sa iyang kapuyo nga maoy hinungdan nga misangko kini sa pagkutlo sa iyang kinabuhi. (Reynald Timario)
