Deputy Mayor Anthony Duyan nag-awhag sa Matigsalug Tribal Leaders nga resolbahon ang bikil sa tribu sa Brgy Lacson

Nanawagan si Obu Manubo Tribe Deputy Mayor Anthony Duyan sa mga Matigsalog Tribal Leaders nga resolbahon ang bikil sa tribu nga nagpuyo sa Barangay Lacson, Calinan District syudad sa Davao.

Sa interbyu sa DXDC RMN Davao kang Deputy Mayor Duyan nga kinahanglan sayron sa mga tribal leaders ang hinungdan sa panagbangi sa tribung Matigsalog nga miresulta sa duguon nga panghitabo sa purok 4, Barangay Lacson human mirespondi ang kapulisan.

Matud ni Duyan nga samtang wala pa magdako ang bangi sa tribu angay mupatunga na ang mga tribal leaders aron mahusay kun unsa man ang gibangi-an nga maoy nipabilo sa kasamok nga maoy hinungdan sa pagkamatay ni Benao Maanib Landas ug pagka-aresto ni Rico Masacay nga mga Matigsalog.

Kahinumduman nga patay usab ang duha ka pulis samtang samaron ang driver sa mobile patrol sa Calinan PNP human miresponde sa kasamok apan nisukol ang mga responsabling membro sa Tribong Matigsalog nga miresulta sa duguon nga engwentro.

RadyoMaN Erin Lumosbog