General Santos City— Ginahulat nalang sa Police Regional Office 12 ang desisyon sa korte kung asa nga detention facility i-kustudiya si Nasifa Pundog, asawa ni Abu Dar nga bag-ong lider sa Maute-Isis.
Sumala kang Police Chief Superintendent Marcelo Morales, Regional Director sa Police Regional Office 12 nga nakasumbitar na sila ug motion sa korte.
Kini gumikan aduna matud pay warrant of arrest sa kauluhan ug sa Lanao ang nasangpit nga suspek nga kasamtangang nagpabilin pa sa kustudiya sa police station 7.
Dugang pamahayag ni RD Morales nga kanunay sila nga andam sa posibleng pagrescue sa Maute-Isis kang Nasifah Pundog kung asa una na kining gihimo sa Marawi City Jail.
Pagpaklaro ni Gen. Morales nga naghugot na sila sa pagbantay sa siguridad aron nga dili magmalampuson ang samang mga bahad sa siguridad.
Kalabot niini gibutyag ni RD Morales nga nagpabilin ang hugot nga pagbantay palibot sa Police Station 7. Gani nagpabilin matud pa ang tropa sa Joint Task Force Gensan aron sa paghatag ug dugang siguridad.
Pag-angkon niya nga sa karon, wala pa silay nadawat nga unsa mang impormasyon nga adunay plano nga pagrescue nga himuon sa nasangpit nga pasilidad ang teroristang Maute-Isis. (Lore Romualdo)
