Apektado sa subong ang pipila ka mga programa sang Provincial Health Office sang South Cotabato para sa mga kabataan tungod sa kontrobersiya sang dengvaxia vaccine base sa nabaton nila nga feedback suno kay Marifort Rafael, Health Education and Promotion Officer sang talatapan.
Ini tungod may pipila ka mga ginikanan dire sa probinsya ang wala na nagpasugot pa nga mabakunahan ang mga kabataan partikular na nga apektado dire ang tuigan nga programa sini sa deworming nga ginapatuman kada bulan sang Enero para sa mga nagaedad sang 1 tubtob 18-anyos.
Suno kay Rafael sa deworming program nila kinahanglan gid nga may-yara sang consent sang mga ginikanan, amo nga kon indi sila magpasugot nga mapurga ang mga kabataan wala man nila ginapilit.
May-angot sini ginapaintiendi nila suno kay Maam Rafael sa mga pumuluyo nga ang dengue vaccine ang bag-o lang nga programa kumparar sa mga ginahatag nga vaccine nila nga madugay na nga ginaimplementar nga garantisado kag epektibo.
Ginpaklaro pa sang mga ini nga indi mangin protektado ang mga kabataan batok sa anuman nga balatian kon indi ang mga ini mapaidalom sa deworming kag vaccination//
