Davao de Oro – Misaka na karon sa 212 ang kaso sa diarrhea sa Barangay Pasian, Monkayo, Davao de Oro rason nga nagdeklara og State of Calamity ang lugar tungod sa maong outbreak diin lima (5) na usab ang natalang patay.
Sa interbyu sa DXDC RMN Davao kang Joseph Anthony Crizaldo, Municipal Information Officer sa Monkayo, gibutyag niini nga natala ang usa (1) ka unang mipanaw tungod sa diarrhea niadtong June 12, 2021, usa (1) niadtong June 15, duha (2) niadtong June 17, pulos mga hamtong ug usa (1) ka bata ang namatay kagahapong adlawa (June 18, 2021).
Matud ni Crizaldo nga nakumpirmang contaminated ang tubig rason nga gipaundang una ang paggamit sa tubig sa lugar ug gina-suplayan karon og mainom nga tubig ang apektadong mga residente.
Dugang sa information officer, aduna usay angulo nga posibleng adunay chemical contamination ang tubig rason nga nagkuha na usab og sample aron kini masayran.
“Ang tubig karon pod kay naa poy angle of chemical contamination. So gipa-test napod by chemical. So, naghulat napod sa result,” sulti ni Crizaldo.
Sa pagkakaron, gipahimutang una ang mga pasyente sa Pasian Gymnasium samtang gidala usab sa mga hospital ang makonsiderang kritikal sa maong balatian.
RadyoMaN Kirby Manzon
