Davao City – Giawhag sa City Government of Davao ang Davaoeños ug tanang katawhan nga saksihan ang online nga selebrasyon sa 36th Kadayawan Festival sugod karong adlawa, Biyernes (Agosto 20, 2021) hangtud sa Agosto 22, 2021.
Alas-5 unyang hapon himuon ang Opening Ceremony sa Kadayawan 2021. Samtang masaksihan ang Tunog Kadayawan alas-8 unyang gabii.
Ugmang adlawa (Sabado), alas-3 sa hapon, virtual usab nga masaksihan ang pinasahing kultura sa dakbayan pinaagi sa Tribu Kadayawan.
Samtang, alas-8 sa gabii muhatag og hugyaw online ang Sayaw Kadayawan.
Sa Domingo, i-showcase alas-10 sa buntag ang ikaduhang hugna sa Tribu Kadayawan.
Dungan kitang manayaw online sa Indak-Indak sa Kadayawan alas-5 sa hapon.
Samtang, ipakita usab ang talento sa Davao designers atol Habi Kadayawan himuon alas-8 sa gabii.
Kini ang ikaduhang tuig sa digital celebration sa Kadayawan sa Davao tungod sa Coronavirus Disease 2019 (COVID-19) pandemic diin una nang giawhag ni Davao City Mayor Sara Duterte-Carpio nga mamahimo gihapong mabati ang espirito sa Kadayawan pinaagi online samtang anaa pa ang pademya.
“Akong gi-awhag ang tanan nga maki sadya kita sa pagsaulog sa ika 36th Kadayawan sa Davao pinaagi lamang sa atong mga cellphone ug computer kay pandemya pa,” sulti sa mayor.
Ang Kadayawan Festival karong tuiga nagtangag sa temang “ONE BEAT. ONE CULTURE. DabaONEnyo.”
RadyoMaN Kirby Manzon
