Ipangibabaw ang pagkadisiplinado para naman sa ikaayo sang mga pumuluyo nga ginaserbisyuhan. Ini ang hangkat sa kapulisan ni Department of Interior and Local Government ukon DILG 12 Regional Director Josephone Leysa.
Ginpahayag ini ni Leysa sang pangunahan ang paglunsar sang Disiplina Muna Advocy Campaign sa PNP 12 regional headquarters sa General Santos City.
Ginaduso ni Leysa nga ang disiplina sang mga police personnel ang magahalin sa pamilya, sa mga malapit nga katrabaho kag bug-os nga police officer. Hingyo man ni Leysa sa mga pulis nga gilayon nga mag-aksyon kon ano ang ginamando sa ila.
Sentro sa paglunsar sang nasambit nga programa ang paghatag ni Leysa sang Medalya ng Kagitingan kay Police Major Romy Castanares. Si Castanares ang nanguna sa hot pursuit operation batok sa kawatan sang motorsiklo sa Surallah, South Cotabato sang Pebrero 21. Nagresulta ini sa pagkadakop sang mga suspek nga sanday Arjay Grayn kag upod sini nga menor de edad.
Narekober man sa duha ang ginkawat suno pa nila nga motorsiklo kag duha ka pakete sang ginapatihan shabu. Ginaduso man ni Leysa , nga ang nasambit nga kadalag-an ni Castanares ang magserbi man kuntani nga maayo nga halimbawa sa iban pa nga mga pulis.
