TACLOBAN CITY – Nagdumara kakulop nga adlaw an Department of Interior and Local Government (DILG) Tacloban Office hin launching han ira kampanya nga “ Matino, Mahusay at Maaasahang” Barangay and SK Officials kaupod an Commission On Elections (COMELEC), PNP, ngan City Government han Tacloban.
An mao nga aktibidad in gin-atinderan han magkadurudilain nga Brgy. Officials ngan mga botante han magkadurudilain nga barangay ha syudad han Tacloban.
Sumala kan Atty. Darwin Bibar, DILG Tacloban City Director nga an gindumara nga aktibidad in kamanduan han DILG Central Office agud mahibaruan han mga botante an nagpapadayon nga kampanya han DILG ha mga katawhan nga magbutang hin basehan ha pagpili han sakto nga mga lider nga mamumuno ha mga tagsa-tagsa nga barangay.
Gintagan hin duon han opisyal, nga kinahanglan an bobotosan nga lider in dapat Matadong, Maaram, ngan Malalauman.
Gin-aaghat han DILG nga diri karagan han mga botante an ira botos ngan kinahanglan anay panginanuon an kwalipikasyon, kakompetensya, ngan an makakagserbe ha iya nasasakupan nga barangay nga nakapailarom ha Local Government Code of 1991.
