Gibutyag sa Department of Interior and Local Government pinaagi ni Provincial Director Engr. Carmelo Enrique P. Libot, CESO V nga ang ilang buhatan bukas sa pagpadawat ug mga contact tracers para sa COVID 19.
Kini ang gipahibalo ni PD Libot sa gipahigayong Provincial Development Council meeting sa Kaamulan Folk Arts Theater, Kaamulan Capitol Compound, dakbayan sa Malaybalay.
Matud pa ni PD Libot nga tumong niini nga matubag ang panginahanglanon sa Department of Health o DOH nga matabangan sila sa contact tracing nga usa sa pamaagi aron mapugngan ang pagkuyanap sa maong virus ug maputol ang pagtinakdanay sa usag-usa.
Ang maong programa gikan sa pundo sa Bayanihan Program II sa Nasyonal nga Pangagamhanan diin mokabat ngadto sa 2,000 ka mga contact tracers ang gikinahanglan sa Rehiyon 10 ug gibana-bana nga adunay mga 300 kapin kung kulang ang mabutang dinhi sa Bukidnon.
Sa nabutang nga post sa Facebook Page sa DILG Bukidnon, usa sa mga kwalipikasyon niini mao ang Bachelor’s Degree relevant to the job nga adunay medical course o criminology. Lakip na sa gikinahanglan ang kahanas sa pagkuha ug mga datus o pagtabang sa research and documentation; andam mo-interview sa COVID-19 cases nga close contact aron makuha ang mga impormasyon kabahin sa travel history ug pagpahigayon sa health assessment; kinahanglan usab anaay katakus sa pagpromotar sa public health education messages ug adunay kahanas sa pag-imbistigar.
Usa sa mga rekisitos niini ang Letter of Intent, Personal Data Sheet o Resume nga ma-download DILG Bukidno FB Page, NBI Clearance ug Drug Test Result. Wala na usab gikinahanglan nga adunay training o eligibility basta adunay mga katakus nga nabutyag sa unahan.
Alang sa mga intresadong aplikante pweding ipasa ang aplikasyon addressed ngadto sa DILG-X Regional Director, Arnel M. Agabe, CESO III pinaagi sa Provincial Director Engr. Carmelo Enrique B. Libot, CESO V ug ipasa ngadto sa mga personahe sa buhatan sa DILG-Bukidnon Provincial Office nga nahimutang sa Kaamulan Capitol Compound, Malaybalay City, Bukidnon o kaha i-email sa dilgbuk.jobapplications@gmail.com.
Ang katapusan sa pagpangdawat ug aplikasyon hangtud lamang sa Septembre 21, 2020. Alang sa dugang impormasyon bisita sa buhatan sa DILG-Bukidnon Provincial Office o sa ilang Facebook Page nga DILG Bukidnon.
