Malaybalay City, Bukidnon – Nagpahimangno ang Department of Interior and Local Government kon DILG Bukidnon sa publiko kalabot sa mga grupo o indibidwal nga nanglibot sa kabarangayan aron manglista matud pa sa ihulip sa mga kasamtangang opisyales sa barangay.
Ang pahimangno sa DILG human sa sumbong sa pipila ka mga katawhan nga adunay mga grupo nga nanglista sa ilang dapit aron matud pa itudlo sa pagka-barangay officials.
Sa interview sa RMN Malaybalay ngadto kang DILG Bukidnon Provincial Director Bruce Colao gibutyag niini nga dugay nang nag-isyu ug advisory ang ilang head office batok niini ilabina ug naggamit sa pangalan sa departamento.
Matud ni Colao nga walay gihatagan ug pagtugot ang ilang buhatan nga manglista ilabina gayud kung ang katuyuan mao ang paghulip sa mga incumbent barangay officials tungod kay walay balaod nga nagtugot niini o kaha kamanduan sa ilang buhatan.
Sigun sa provincial director nga usa kini ka matang sa illegal nga binuhatan ilabina ug nagpakatag kini ug sayop nga impormasyon. Samot na matud pa kung aduna nay kwarta ang involved.
Gi-aghat pa niini ang publiko nga itaho gilayon sa kapulisan.
