Davao City – Nagpahimangno ang Department of Interior and Local Government (DILG) nga mag-atubangon gayud og silot ang mga barangay officials kung pakyas niining mapatuman ang Barangay Drug Abuse Council (BADAC) sa ilang mga barangay.
Sa pakighinabi sa DXDC RMN Davao kang DILG-XI Regional Director Alex Roldan, gibutyag niini nga tanang mga barangay dinhi sa Davao region nagbaton sa BADAC apan angay nga masusi kung tanan bang barangay aktibong nag-implementar niini.
“100% ta naa aning BADAC. Apan didto magdaug kung naa ang structure, naglihok ba pud ang structure. Kana ang gi-evaluate nato.” segun niini.
Gipasabot ni Roldan nga angay mahimong aktibo ang BADAC sa usa ka barangay sama sa pakig-alayon sa kapulisan ug pag-report sa kalambuan niini ngadto sa DILG.
“Atong mga barangay officials are expected to follow, labi na sa atong paghimo sa atong community-based drug rehabilitation program. So ang barangay ang maoy manguna niani ug dako’g tahas dinhi ang BADAC nga mamahimo kining epektibo.” segun niini.
Gibutyag ni Roldan nga sauna pa, kabahin na sa tahas sa barangay ingon man sa munisipilidad ug sa usa ka syudad nga magbaton ug Anti-Drug Abuse Council (ADAC) gawas sa ilang peace and order council.
Nasayran nga ubay-ubay na usab ka mga alkalde sa nasud ang nakasuhan og grave misconduct in office and gross dereliction of duty tungod sa kapakyasan sa pagmugna og ADAC sa ilang lokalidad.
RadyoMaN Kirby Manzon
