Davao City – Gipanawagan sa Department of Interior and Local Government (DILG) ang mga Local Government Unit (LGU) nga ipadayon ug pakusgan ang kampanya sa pagpabakuna batok Coronavirus Disease 2019 (COVID-19).
Sa interbyu sa DXDC RMN Davao kang Alex Roldan, DILG-XI Regional Director, gibutyag niya dakong hagit alang sa matag LGU nga mapasabot sa ilang mga residente ang importansya sa bakuna labi na nga daghan gihapon ang nagdumili o nagduha-duha nga mopailawom sa vaccination program.
“Ang amo karong gihangyo ngadto sa atong mga local government unit, ipadayon nato ang atong kampanya nga ang mga tao musalig sa bakuna. Mao karon ang dakong challenge sa pag paabot nato sa mensahe ngadto sa mga katawhan nga dili sila angay nga mabalaka niining bakuna,” saysay ni Roldan.
Segun ni Roldan nga kinahanglang mosalig ang publiko sa gobyerno ug mga health experts nga mao ang mas nasayud niini. Apan giklaro sa DILG official nga boluntaryo lamang ug walay pinugsanay ang vaccination.
Karong bulana lamang (Marso) sa dihang gisugdan ang vaccination roll out dinhi sa Davao City diin unang gibakunahan ang mga healthcare workers nga anaa sa priority list sa gobyerno.
RadyoMaN Kirby Manzon
