Gikumpirma ni Doctor Roy Mejorada, ang marine biologist og in-house veterinarian sa Environmental Conservation and Protection Center kon ECPC, ilalum sa opisina ni Governor Steve Chiongbian Solon nga kagahapon lang adlawa, adlaw nga Hwebes, nakita sa ilang research team ilalum sa dagat sa Barangay Ladol, lungsod sa Alabel, Sarangani Province ang gibana-banaan tulo (3) hangtud lima (5) kabuok mga butanding kon whale sharks.
Gisuta na karon sa ECPC Sarangani kung ang ilang nakita sa Ladol kagahapon ang dili kapareha sa trese (13) kabuok butanding nga nakit-an bag-uhay lang sa Queen Tuna Park og sa bandang Silway, Gensan og ang usa (1) nga na-ispatan sa Tuka Marine Park sa lungsod sa Kiamba. Kung managlahi ang mga nasangpit, muabot na sa baynte-uno (21) ka butanding ang gabisita sa Sarangani Bay.
Ang ECPC Sarangani ang maoy nangulo karon sa research team gipangunahan ni Doctor Mejorada nga gitahasan sa gimugna nga Task Force Butanding aron magpahigayon og monitoring og documentation sa entiro Sarangani Bay, kauban ang mga marine biologist og diver gikan sa nagkadaiyang ahensya sa gobyerno.
Mahinungdanon nga ma-proteksyunan ang mga butanding tungod kay gawas nga gabalhin-balhin silag pinuy-anan og dili mamaak, kabahin usab sila sa gapa-balanse sa ecosystem ilalum sa kadagatan. Bawal kining gunitan, pakaunon, pasakitan og picture-an nga adunay flash ang camera. Pwedeng mabilanggo og makamulta ang mudagmal kanila. Kung adunay sighting sa butanding, pwedeng ma-kontak ang ECPC Sarangani sa numero nga 083-508-3501 og 09166427828.
