General Santos City–Gikabutyag ni Police Major Ananias Vasquez ang labaw sa Police Station 2 nga karong adlawa gikatakdang pasakaan ug kasong kalapasan sa Sec.5 Art.ll sa RA 9165 kon Comprehensive Dangerous Drugs Act of 2002 ang suspetsadong si Judy Coleta , 44 anyos, driver nga nanimuyo sa brgy.Fatima kansa nasikop sa kapulisan sa buy bust operation.
sumala pa ni Vasquez nga nadakpan nila ang suspek sa may National Hi-Way Prk. San Roque Labangal alas 4:45 sa hapon human kini napalitan ug usa ka sachet nga gituohang shabu atol sa operasyon sa usa ka poseur buyer nga sakop usab sa operative team gamit ang 500 pesos nga buy bust money.
Dugang asoy sa opisyal nga dugay na nilang ginamonitor ang nasampit sa ilang AOR nga gapamaligya ug ginadiling droga gani sumala pa niini nga bisan asa lang nga lugar moabot ang suspek aron lamang mamaligya ug droga.
Gipaklaro man usab ni Police Major Ananias Vasquez nga mikunhod gayud ang droga sa ilahang AOR kumpara kaniadtong tuig 2016 ug 2017 kung asa daghan ang nagasulod nga droga gani atol sa ilang mga operasyon bulto-bulto nga mga droga nga ilang makumpiska gikan sa mga drug suspek.
Saysay usab ni Vasquez nga sagad sa ilang mga parokyano mga habal-habal driver ug sumala pa niini nga hapsay man usab ang padayon nilang monitoring sa matag eskwelahan ug duna usab silay gihimong anti-drug lecture sa mga estudyante. (Reynald Timario)
