General Santos City–Gikumperma ni Police Major Basher Alindo, Hepe sa Police Station 5 nga dugay na nilang gimonitor ang illegal drug activity sa suspetsadong si Danilo Laura, 42 anyos, usa ka driver nga taga Purok Wal, Barangay Tambler, Gensan kansa una nang nadakpan sa gihimong operasyon niadtong nakalabayng adlaw.
Matud ni Alindo nga pipila usab ka simana nilang gipailawom sa surveillance ang suspek ayha nila gihimo ang usa ka buybust operation.
Nasayran nga napalitan ug usa ka sachet sa gituohang shabu ang suspek sa usa ka nagpakarong-ingnong police gamit ang P500 nga marked money.
Dugang pagbutyag ni Police Major Alindo nga human gipailawom sa buy-bust operation ang suspek gironda usab nila ang panimalay sa nasampit gumikan sa kalapasan sa paghupot ug iligal nga armas.
Apan wala nay narekober nga pusil ang kapulisan atol sa ilang ronda tungod posibleng nataguan na kini sa suspetsado. Apan basi matud pa sa impormasyon nga nakaabot kanila, aduna gyoy gihuptang armas ang suspek.
Hugtanon usab nga nanghimakak ang suspek nga siya lambigit pa sa iligal nga droga.
Gihimakak sab niini nga siya napalitan ug shabu sa kapulisan. Sumala niini nga wala siya nakuhaan ug shabu dihang gihimo ang operasyon sukwahi sa pahayag ni Police Major Alindo.
Dugang pagbutyag ni Laura nga siya nahibulong asa gikan ang usa ka sachet sa gituohang shabu nga gisulti sa PNP nga ilang napalit kaniya.
Sa karon ang takna nang pasakaan ug kasong kalapasan sa RA 9165.
