General Santos City—patong patong nga kaso ang atubangon sa usa ka 24 anyos nga lalaki human kining nasikop sa gihimong search operation ug gireklamo ug pagpanglugos sa usa ka minor de edad sa Police station 4 ning dakbayan.
Una nang nasikop sa operatiba sa Police Station 4 alas 10:00 ang takna sa buntag niadtong Martes, Mayo 16, 2017 ang suspetsadong si Gabriel Besonia, 24 anyos ug residenti sa sa Prk 4, Barangay Mabuhay atol sa gihimong search operation human kining nakuhaan ug (5) ka sachet sa gituohang shabu sulod sa iyang panimalay.
sumala ni Police Sr. Inspector Lemuel Enrijo, Deputy Chief of Police sa Police Station 4 nga dugay na nilang gipanid-an ang suspek ayha pa nila kini gipailawom sa operasyon. Apil usab kini sa Drug Watch list sa Police Station 4.
samtang gawas sa kasong paglapas sa Sec. 11, sa Art. II sa RA 9165 nga ipasang-at nga kaso batok sa suspek, posibling pasakaan usab kini ug kasong pagpanglugos, kini human nga gireklamo sa usa ka minor de edad ug pagpanglugos.
Sumala ni PSI Enrijo nga nahidangat ang ginikanan sa minor de edad uban ang biktima ug ang witness ang nahidangat sa Police Station 4 aron ireklamo ang nanglugos sa biktima apan nakurat nalang ang kapulisan dihang mikalit kinig tyabaw dihang iyang nakit-an ang suspek nga si Besonia kinsa gipailawom sa interogasyon niadtong higayuna.
Didto na gitudlo sa biktima ang suspeknga maoy milugos ngadto kaniya pila na ka adlaw ang nakalabay, tungod niini wala na kapugngi sa amahan sa biktima ang iyang kaugalingon, iya gyong nasumbagan ang suspek.
Sa karon ginahulat nalang sa PoliceStation 4 ang reklamante nga mubalik sa ilang buhatan aron pormal nga ipasang-at ang kasong pagpanglugos.
