Davao City – Gipatutukan karon sa Police Regional Office (PRO) XI ang kaso sa pagpusil-patay kang Bansalan, Davao del Sur media man Orlando “Dondon” Dinoy niadtong October 30, 2021 adlawng Sabado pasado alas-6:00 sa gabie sa mismong apartment niini sa Mother Ignacia Street, Poblacion Uno sa Bansalan, Davao del Sur pinaagi sa pagtukod og Special Investigation Task Group (SITG).
Sa interbyu sa RMN Davao kang Police Regional Office XI spokesperson Police Major Eudisan Gultiano, gimando ni Regional Director BGen Filmore Escobal ngadto sa SITG ang paspas nga imbestigasyon sa maong kaso aron sa pagkab-ot sa hustisya sa gipusil patay nga biktima.
Padayong ginaestablisar sa kapulisan ang motibo sa pagpatay kang Dinoy.
Sumala ni Gultiano, .45 nga pusil ang gigamit sa pagkutlo sa kinabuhi sa biktima ug duha ka mga suspetsado ang ginalantaw nila nga nihimo sa krimen base kini sa mga pamahayag sa saksi sa insidente.
Sumala sa report samtang galuto kini’g panihapon nigawas kini sa iyahang giabangang balay tungod adunay nangita kaniya apan sa dihang giablihan na niini ang gate, napusil na ang gunman og kaduha og niigo sa ligid sa iyahang motorsiklo apan nakaiktad kini ug nakadagan sa sulod sa iyahang balay apan gisulod kini mismo sa mamumuno ug gipaulan og bala.
Nakahiagom kini og mga samad-pinusilan sa iyahang kalawasan.
Sa interbyu sa kapulisan sa silingan nga menor de edad, nakadungog kini’g unom ka buto ug aduna kiniy nakitang lalaking anaa sa medium ang built, nakakalo, naka-short pants ug t-shirt duol sa kwarto sa biktima ug usa ka pa ka lalaking nakamotor nga parehong wala naindentipika sa saksi ang mga dagway.
Sa pikas bahin, gimanduan ni Philippine National Police (PNP) Chief, Police General Guillermo Lorenzo Eleazar si Regional Director Bgen Filmore Escobal nga patutukan ang murder case ug sa pagaresto sa responsible sa krimen.
Nangayo usab og tabang ang labaw sa PNP sa publiko ngadto sa adunay impormasyon nga makigalayon sa kapulisan.
Nagpaabot usab og pahasubo si Eleazar sa nahibiling pamilya ni Dinoy.
RadyoMaN Aimee Guinita
