Davao City – Ang dili dayon pagsunod sa mga tawo sa pahimangno gikan sa ahensya sa gobyerno kabahin sa kalamidad sama sa bagyo, maoy hinungdan kung nganong daghan ang makalas nga kinabuhi o mawala kun mag-‘missing.’
Sumala sa chapter head sa grupong Kabalikat Civicom 995 nga si Prime Cruz, mag-unsa man ang gihimong mga pagpangandam ug pasidaan sa gobyerno kung ang tawo dili motuman moresulta gayud kini sa daghang mamatay.
Matud ni Cruz, lahi ang bagyo kung itandi sa linog tungod kay ang bagyo, mahibaw-an na kung unsang orasa moabot ug asang dapit moigo pinaagi sa weather forecast sa weather bureau, dili sama sa linog nga kalit kaayo ug di mahibaloan.
Dugang ni Cruz nga aron malikayan ang mga suliran sa higayong dunay bagyo nga moabot sa usa ka lugar aron walay mahitabong panic buying ug uban pang mga suliran sa usa ka lugar, kinahanglang ang tawo motuman gayud sa mga pahibalo o panawagan sa ahensya sa kagamhanan nga maoy gitahasan.
Gipasabot pa usab ni Cruz, kinahanglan sa matag pamilya dunay family ‘evacuation plan’ ilabi na kung nagpuyo kita sa mga lugar nga maigo sa mga pagbaha, linog, bagyo ug uban pang kalamidad aron maseguro ang kaluwasan.
Matud sa disaster management advocate nga matag sakop sa pamilya dunay tagsa-tagsa ka mga tahas nga maoy himoon kung dunay kalamidad nga masinatian.
RadyoMaN Bernard Pantallon
