Davao City – Wala ra makamugna og dakung kadaut kun damyos sa mga pampublikong gambalay ug pasilidad ang Magnitude 5.6 nga linog nga miigo sa lungsod sa Makilala, North Cotabato.
Matud ni Department of Public Works and Highways (DPWH-XI) spokesperson Dean Ortiz, wala ra makahimo og grabeng distroso sa mga istruktura sa gobyerno ang nakalabay’ng pagtay-og.
Nabati ang Intensity 4 sa lungsod sa Matan-ao ug Magsaysay sa Davao Del Sur ug siyudad sa Dabaw diin ang Philippine Institute of Volcanology and Seismology (PhiVolcs) nakatala na og 53 ka mga aftershocks sukad sa insidente.
Gikumpirma ni Ortiz nga human sa nasinating paglihok sa kayutaan, nakadawat ang ilang buhatan og tawag gikan sa nagkadaiyang buhatan aron ipasusi ang estado sa ilang mga istruktura kun mga gambalay.
Segun ni Ortiz, naliki ang pipila ka parte sa Elementary ug Secondary ingon man ang Municipal Hall sa lungsod sa Magsaysay, Davao Del Sur maingon usab sa Matan-ao apan dili ra kabalak-an.
Gitino sa spokesperson nga dili tanang pampublikong gambalay ug istruktura gitukod sa gobyerno sanglit ang uban gi-work out na sa ubang mga ahensiya.
Gipasabot ni Ortiz nga una nila hingpit ipatuman ang proyekto, ila unang kuhaon ang datos gikan sa Mines & Geosciences Bureau (DENR-MGB) aron masuta ang estado sa yuta una pa man gamitan og teknolohiya nga haum sa itukod nga gambalay.
Busa kampante ang maong opisyal nga lig-on ug makabarog kita sa bisan unsa nga kalamidad sama sa linog.
Apan dili angay mo-kumpiyansa gumikan kay kun ang kinaiyahan na gani ang motiyabaw, kaya kaayo niining pahuyangon ang pundasyon ug tumbahon ang istruktura ug labaw na kun kusog ang temblor dugang ni Ortiz.
RadyoMaN Joel Viray
