Disgrasya sa motor sa Mintal back rider patay, nag-areglo na

Davao City – Nag-areglo ang duha ka kampo sa pamilya sa back rider nga nakabsan sa kinabuhi, samtang ang driver naangol human nadisgrasya ang motor nga ilang gisakyan, alas 4:50 sa kadlawon, Pebrero 15, 2024 sa Sampaguita Street, Mintal, Davao City.

Giila ang back rider nga si Elizar Gimoya, taga Special Block, Holy Cross Davao, samtang ang driver si Gilbert Daligdig, nagpuyo sa Lapu Lapu Purok 5, Isla Noah, Agdao, Davao City.

Sa interview sa DXDC RMN Davao kang PSSg Elmer Domincel,Traffic Investigator sa Tugbok Police Station gisulti niya, abagahon sa pamilya sa driver ang gasto niini alang sa paghiluna sa back rider nga namatay.

Segun ni Domincel, nakarecover na usab ang driver nga nadala sa Southern Philippines Medical Center (SPMC) og padayong pang gi-atiman sa mga Doctor.

Dugang sa opisyal, subay sa ilang gihimong inbestigasyon, self accident ang nahitabo samtang padulong sa downtown, apan pag-abot sa kurbada nga bahin sa maong lugar, kalit nawad-an og kontrol ang driver hinungdan nalagbot ang back rider og nakaangkon samad sa nagkadaiyang parte sa lawas nga resulta sa iyang hinanaling kamatayon.

RadyoMaN Don Pulayao