General Santos City—lima ang angol sa nahitabong pagbangga sa pick up ngadto sa tricycle nga nahitabo sa National highway sakop sa Purok Palen, Barangay Labangal, Gensan alas 6:20 ang takna kaganinang buntag.
Mga biktima nailhang silang si Eron James Tagnawa, 17, Mine Chards Bahador, Francis Tagnawa, 16, Aurilita Tagnawa, 64 ug Wanito Tagnawa, 63, pulos residenti sa EMB homes, Barangay Labangal Gensan.
Samtang driver sa pick up giilang si Arjay Billemac, 20, residenti sa Barangay North Gensan.
Sa inisyal nga imbistigasyon sa Traffic Managerment Unit nasuta nga padulong sa barangay North ang pick-up samtang ang tricycle paliko sab sa Purok Palen, Barangay Labangal pauli unta sa EMB homes apan nabanggaan kini sa naghaguros nga pick-up. Nangalagpot ang sakay sa tricycle nga miresulta sa pagkaangol sa mga biktima kansa daling gidala sa Mindanao Medical Center.
Samtang ang driver nga si Arjay gikustudiya karon sa traffic management unit. Giangkon ni Arjay nga siya nakainum samtang gimanihuan ang sakyanan apan iyang gihingusgan nga usa ra ka bote sa bino ang iyang nainum. Nasayran nga miovertake kini sa gisundang Van ug wala niya nabantayan ang mitabok nga tricycle mao nga iyang nabanggaan.
Sa karon padayon ang gihimong imbistigasyon kalabutan sa insidenti.
