Davao City – Halos matag adlaw sa matag semana makatala og suicide ang pipila ka police station sa siyudad ug sagad sa hinungdan mao ang gihambin nga problema nga misangko sa depresyon.
Ang pagsaka sa kaso sa depresyon ug sa suicide gika-alarma kini ni Parents Mobilization Action Group focal person Febe Matthew.
Gibasol ni Matthew ang social media ug mga teleserye kay mao kana ang rason ngano wala na’y oras ang anak ug mga ginikanan mag-istoryahanay busa kun dunay problema dali ra madepres ug magsuicide.
Dili sayon mag-inusara sanglit ang tendency kun walay masultihan sa problema mao nga ma-depress ug magsuicide.
Ug mao kini ang nahitabo kang Matthew dihang nag-abroad kini diin miagi usab siya og depresyon gumikan kay wala siya’y mapagawasan sa iyang mga problema.
Ug maayo na lang kay wala musantop sa iyang hunahuna ang pagkutlo sa iyang kinabuhi.
Aron among matuhog ang hinungdan sa depression, among gihinabi si Gheena Agtas kinsa graduating sa Masteral Degree sa Counseling Course sa Koinonia Theological Seminary Foundation Incorporated (KTSFI).
Siya nag-ingon, ang social media dakong kontribusyon sa depresyon sa mga batan-on karon ug sagad ka-nila dili magduha-duha sa pagkutlo sa ilang mga kinabuhi.
Gisulti ni Dr. Ermela Deposa, Counseling Coordinator sa KTSFI nga dili lang abuso ang rason sa depresyon apan bisan pa ang disintegrated family nunot sa pagtrabaho sa laing sa nasud sa miyembro sa pamilya.
Gipasabot ni Dr. Deposa, delikado ang depresyon tungod kay ang tanan nga makita sa kaugalingon pulos na mga negatibo ug aron matuldukan ang pag-antos maghunos na lang sa kinabuhi.
Mga kasama, bisa’g unsa kadako sa problema isipa nga dunay Dios nga atong kasandigan ug hinumdumi dakong sala sa atubangan sa Ginoo ang pagpakamatay.
RadyoMaN Joel Viray
