General Santos City—Gikumperma ni Kagawad Atty. Edmar Yumang nga mag pahigayon sila ug imbestigasyon sa konseho kabahin na sa wala mahan-ay nga distribusyon sa Social Amelioration Program (SAP) sa mga barangay human nga daghan matud pa ug reklamo ang mitumaw.
Kini aron nga ilahang masuta kung gi-unsa sa pagpili sa buhatan sa CSWDO o DSWD sa mga kwalipikadong indibidwal ug kung nganong adunay mga nahatagan ug pinansyal nga ayuda nga arangan ug kinabuhi.
Posible nga ilang ipatawag ang mga taga CSWDO, DSWD Region-12, Barangay Official, City Treasurer’s Office ug mga Purok official sa ilang ipahigayon nga imbestigasyon.
Segun pa ni Kagawad Yumang nga ila kining himuon aron nga makamugna ug pamaagi ug mahimuan ug nindot nga sistema aron mahan-ay ang pagpanghatag ug ayuda gikan sa gobyerno.
Samtang dismayado usab si Kagawad Yumang sa nahimong sitwasyon sa pag panghatag ug ayuda sa goberno ngadto sa mga binipisyaryo, human nga wala nasunod ang Social Distancing nga usa sa mga mando sa national nga pangamhanan aron malikayan ang Covid-19.(CDS)
