Davao City – Walay perpektong kaminyoon sama ra nga walay hingpit nga tawo ibabaw ning kalibutan: Kitang tanan – ma-indbidwal man o ma-institusyon kun hut-ong – aduna gayuy mga kakulangon, kasaypanan ug mga kabilinggan.
Ug gumikan niana, angay kitang tanan taas ang atong pisi kun tolerance sa ing-ani nga mga sitwasyon diin ang managtiayon moabot gayud sa punto nga magkabangi usahay mosangko pa gani sa sinitahay, tinubagay ug pisikal nga pasakitay ug sinukmagay.
Angay natong salbaron ang gitawag nga mga families in distress, dili kay hatagan na hinoon sila ug hinagiban haron mas madali ang kamatayon sa ilang panagkuyog ug gipanumpaan didto sa altar sa kaminyoon.
Ako nagtoo nga kun anaa na gayud sa balag sa alanganin ang usaka problemadong pamuyo, mas gikinahanglan sa magti-ayon nga moluhod atubangan sa Kahitas-an sanglit wala may imposible Kaniya sama sa pagpasig-uli kun pag-reconcile sa nagkasungi nga mag-asawahay.
Sa higayon unya nga wala nay kadangpan ang nagkasuliran nga relasyon, lehitimo lamang usab nga opsyon nga sagopon kun unsa ba ugaling ang gitagana diha sa balaud.
Kun anaa ang divorce sa atong pamalaud, wala akoy nakitang rason kun nganong atong ihikaw sa nasakitan nga spouse kun partner nga mag-move on sa kun unsay nahibilin nga mga tipaka sa iyang naguba nga kasingkasing ug pangandoyon pag-usab nga magmalipayon sa iyang bag-ong kinabuhi.
Dautan ba diay nga mobiya sa usaka ‘abusive relationship’? Dautan ba diay kun human ang tanang paningkamot nga i-salbar ang malisud nga relasyon wala sa gihapoy nahitabo nga itikang na nato ang mga tiil ngadto sa bag-ong dalan ug pugson ang kaugalingon nga padayong magmalaumon sa mas maayong kaugmaon?
RadyoMaN June Duterte
