Davao City – Miabot sa kapin 20 ka mga tabanog ang gipangkuha sa personahe sa Davao Light and Power Company kun DLPC nga nangasangit sa mga linya sa kuryente.
Sa pakighinabi sa DXDC RMN Davao kang Ross Luga, Corporate Communications Officer sa DLPC, daghan na matud pa ang natalang brown outs sa syudad gumikan sa mga nangasangit nga tabanog sa linya sa kuryente.
Dugang niini, anaa sa 25 ka mga tabanog ang nakuha nga gikabalak-an sa DLPC gumikan imbes nga trabahuon sa mga personahe ang uban pang trabahuon, nabusy na hinuon og responde sa mga tabanog gani delikado usab nga basin makuryentahan ang naggunit sa pisi sa tabanog og masangit sa linya sa kuryente ang pisi.
Pipila sa mga lugar asa nakuha ang mga tabanog mao ang Tibungco, Cabantian, Barpa Agdao, Matina, Matina Aplaya ug uban pang lugar sa syudad.
Subay niini, gihangyo sa DLPC ang mga kapitan sa barangay ingon man mga ginikanan nga monitoron ang mga anak ug dili tugtan nga magpalupad og tabanog ilabi na karon nga gipailawom sa Enhanced Community Quarantine ang rehiyon XI gumikan sa COVID-19.
RadyoMaN Renz Barbarona
