DND nagklaro sang pangalan ni VM Gavaran, kapangalan lang

Bacolod City – Indi siya ang ginatumod nga Samuel Gavaran nga amu naman ang ara sa Arrest Orrder No. 2 nga ginpaguwa sang Department of National Defense sang June 5, 2017.

Ini naman ang konpirmasyon ni 3rd Infantry Division commander, Maj. Gen. Jon Aying sa interview sang DYHB kaina sang aga. Suno kay Aying nga nagpakig-angot sa iya personal si Defense Secretary Delfin Lorenzana kag nagpabalo nga indi si Vice-Mayor Samuel A. Gavaran sang banwa sang Binalbagan ang ila nga gintumod kondi isa ka Samuel Gavaran nga nagbalik-Islam nga pumoloyo sang Northern Mindanao.

Una na nagguwa sa Manila Standard ang pangalan ni Gavaran sa diin nakabutang pa nga ini siya ang anay bise-alkalde sang Binalbagan nga ginkabalaka naman sang iya pamilya.


Nagahilibion si Gavaran sang nainterview ini sang Straight to the Point kahapon sa diin iya ginsiling nga indi niya mahakos kon ngaa nga nagguwa ang iya pangalan bilang isa sa mga supporters sang ISIS-Maute nga ni isa ka bes wala man gani ini nakapadulong sa syudad sang Marawi.

Paano man siya mangin finacier bangod napuno man gani sang utang kag prindado pa ang balay sa bangko.

Nagakabalaka pa si Gavaran bangod may problema sa ‘heart’ ang iya misis kag ila nalang ini gani ginapaulu-umpawan.

Sa post sang iya bata sa facebook, iya ginscreenshot ang text message ni Defense Secretary Delfin Lorenzana nga nagasiling:

*”Vice, I have directed the AFP to check your name again. Namesake mo daw yun. He is a Samuel Gavaran from Northern Mindanao who is a Muslim convert. I sincerely apologize for the mistake and for dragging you into this. YOU ARE, HENCEFORT, CLEARED. I shall issue a directive stating that Samuel A. Gavaran, Vice Mayor of Binalbagan, Negros Occidental is hereby removed from the Arrest Order Nr. 2, dated 5 June 2017.”*

Gindepensahan man si Mayor Emmanuel Aranda sang Binalbagan, sa diin suno sa alkalde apisar nga kontra ini sila sang nagligad nga eleksyon, wala sya snag nakit-an nga mga palatandaan nga may kaangtanan ini sa Maute-ISIS Group.

Para kay Aranda, ‘unfair’ kag ‘baseless’ ang akusasyon sa iya nga bise-alkade sa diin ginhambalan sini ang mga pomoloyo sang banwa nga indi magpati sa amu nga akusasyon. Nagpanugyan man ini kay Gavaran nga makig-angot sa mga opisyal sang pulis, NBI kag militar para personal nga klaruhon ang akusasyon sang rebelyon.

Si Gavaran, isa ka simpli nga tawo sa banwa kag nagakabuhi bilang isa ka manug-ihaw kag nagabaligya sang mga karne sa merkado sang banwa.

Facebook Comments