Gitrabaho na karon sa Securities and Exchange Commission kon SEC ang pag-andam sa tanang documentary evidences aron ilang gamiton sa pagpasaka sa kasong Criminal batok ni KAPA Founder Pastor Joel Apolinario.
Mao kini ang gibutyag ni SEC Regional Director Renato “Rene” Egypto sa interview sa dxCC-RMN.
Matud ni Egypto nga ang ilang opisina sa SEC Manila, mao na ang mopasaka sa kaso batok ni Apolinario ug uban pang nga opisyal sa KAPA nga naglakip sa ilang satellite office sa Igpit, Opol, Misamis Oriental ug Valencia City, Bukidnon.
Gibutyag ni Egypto nga si Apolinario ug mga kaubang opisyal sa KAPA, mag-atubang sa kasong Violation sa Republic Act 8799 ang gitawag nga Securities Regulation Code of the Philippines.
Matud ni Egypto nga ang SEC, dili mo-file ug kasong Estafa batok ni Pastor Apolinario ug mga kaubang Kapa officials.
“Kadtong mga miyembro sa KAPA mahimo silang maoy mo-file sa kasong Estafa kon dunay ilang reklamo” matud ni Egypto.
Gibutyag ni Egypto nga ilang gi-runda ang tanang opisina sa KAPA sa Mindanao kay illegal ang ilang operasyon sa pagpangolikta sa salapi sa ilang mga miyembro nga walay panugot sa SEC.
Matud ni Egypto nga ang KAPA, walay primary license nga gitawag og “Profit Corporation license” ug walay “Certificate of Authority” gikan sa SEC.
“Dili igo nga narehistro ang usa ka organization sama sa KAPA, kinahanglan gyud dunay ilang Profit corporation license ug Certificate of Authority kon mo-engage sila sa pagpangolikta og kuwarta gikan sa ilang mga member” matud ni Egypto.
Giklaro ni Egypto nga ang Kapa, dili na makabalik sa ilang operasyon, labi na kon ma-file na sa SEC Manila ang kaso batok ni Apolinario ug mga kauban.
