Gikumpirma ni Doctor Roy Mejorada, ang in-house veterinarian og research and development section head sa ECPC Sarangani (Environmental Conservation and Protection Center), nga ang documentary film nga “Bird of Prey” ang ipasundayag karong umaabot nga bulan sa Nobyembre atol sa selebrasyon sa MunaTo Festival 2019.
Kini ang nakab-ot nga plano sa ECPC Sarangani sa pagdumala ni Executive Director Kido Ramirez kauban ang Davao-based Philippine Eagle Foundation human nahimong nagmalampuson ang pagpasalida niini sulod sa sinehan sa Robinsons Mall Gensan atong Hunyo sa kasaulugan sa Philippine Eagle Week, kung diin nahimong co-presenter ang Provincial Government sa Sarangani kuyog ang DENR Region 12, USAID Protect Wildlife og LGU Maitum.
Wala kini laing tinguha kundili daghan pang indibidwal ang matagaag saktong impormasyon kabahin sa Philippine Eagle nga maoy pambansang ibon og ang dakong papel niini sa pagbalanse sa kinaiyahan isip mga natural pest controller.
Wala na kaabot og 400 kabuok paresan sa Philippine Eagle ang nabuhi karon sa tibuok Pilipinas. Maong swerte ang Sarangani Province tungod kay aduna pa kini mga agila nga anaa sa kalasangan sa Mount Busa partikularminte si Philippine Eagle Sarangani Pride nga anaa sa Maitum.
Hugot ang nahimong kampanya entiro Sarangani nga ma-protektahan ang kinaiyahan og ang mga wildlife resources ilalum sa Sulong Kalikasan program ni Governor Steve Chiongbian Solon, sa pagsuporta nila Senador Manny og Congressman Ruel Pacquiao, Sangguniang Panlalawigan og mga mayores.
Usa ka ultra HD/high definition images ang “Bird of Prey” maong klaro kining lantawon sulod sa usa og tunga sa oras (90 minutos). Conservation award-winning documentary kini nga gimugna sa Cornell Lab of Ornithology, Neil Rettig Productions og Philippine Eagle Foundation.
(Photo Credit to the owner)
