Natalana nga buksan kag mangin operational sa masunod nga bulan kadungan sang rabies month sang Provincial Government sang South Cotabato kag municipal government sang Surallah ang dog impounding facility nga nahamtang sa banwa sang Surallah, suno kay Provincial Veterinarian Dr. Flora Bigot.
Suno kay Dr. Bigot ang LGU Surallah na ang mag-implementar sa pagpangdakop kag impound sang mga madakpan nga ido nga ginapabay-an paagi sa ila nga municipal agriculture office matapos nga ang lokal nga panggobyerno na ang maggasto sa operasyon sang pasilidad .
Nahibaluan nga ginpainan sang provincial government sang P1.5 million ang dog impounding facility kabahin sang rabies eradication program kag pagtapna sa mga stray dogs nga nagadala sang rabies.
Sang bulan sang Enero subong nga tuig may narekord na nga isa nga napatay tungod sa rabies sa probinsya.
