Nibarug ang Department of Health (DOH) sa posisyon niini nga hingpit ibawal ang paggamit sa pabuto ug unsa mang klase sa pyrotechnic devices sa kada bag-ong tuig.
Gumikan kini sa taas pa gihapong ihap sa mga nasamdan ug naka-angkon ug injury gumikan sa pabuto dungan sa pagsugat sa tuig 2020.
Sa interview sa RMN Malaybalay ngadto kang Dr. David Mendoza, ang assistant regional director sa DOH 10 gibutyag niini nga ma-legal man o illegal ang pabuto makahatag pa gihapon kini ug kadaut.
Alang sa ahensya angayang makabatok sa balaod aron mahimong iligal ang tanang fireworks, ilabina kadtong mga mugamit sa mga kada pamilya.
Aminado usab si Dr. Mendoza nga dili usab kini dali ang mao nga sugyot tungod kay daghang factor ang gikonsidera niini sama sa ekonomiya, manufacturer ug basin daghan ang mawad-an ug trabaho.
Gisugyot usab sa opisyal nga kinahanglang magsugod ang kampanya sa fireworks dili lamang sa bulan sa Disyembre kon dili pagsulod pa lamang sa ber months tungod kay adbokasiya nila nga adunay gitawag nga behavioural change sa matag katawhan.
