Davao City – Kumpletong 100 porsyento sa mga batang nag edad 5 anyos paubos ang target sa Davao City Health Office (CHO) nga mabakunahan.
Kini subay sa pag-arangkada sa ‘Sabayang Patak Kontra Polio’, simultaneous mass vaccination sa polio, nga pilot area ang Davao City ug Davao del Sur diin opisyal kining gilusad sa Brgy. 5-A, ning syudad sa Dabaw.
Sumala ni Dr. Josephine Villafuerte, head sa CHO, tubag nila kini human nakitang nagpositibo ang Davao river sa Type 2 Polio virus sa milabay’ng bulan sa Setyembre.
Gani, target nila ang 186,164 ka mga bata nga mabakunahan aron hingpit kining mabatukan.
Atol sa kick-off ceremony, gipakita sa mga opisyales sa Department of Health, Unicef, ug World Health Organization ngadto sa mga mitambong ang oral polio vaccination isip pagpakita nga luwas ang maong bakuna.
Kasabay niini, giawhag ni Villafuerte ang tanan ilabi na ang mga ginikanan nga pabakunahan gayud ang ilang mga anak ilabi na nga mubisita sa balay ang health officers.
Sugod karong adlawa, Oktubre 14, ngadto 27 ang round 1 sa vaccination; Sundan kini sa Nobyembre 25 hangtod Disyembre 7; Ug gikatakda sa Enero 6 ngadto 18, 2020 ang ikatulong hugna sa pagpabakuna.
Samtang gibutyag ni DOH-XI Regional Director Annabelle Yumang nga anaa sa 594,575 ang target nila nga mabakuhan sa tibuok Rehiyon.
RadyoMaN Jason Amisola
