Nakarekord na sang apat nga kaso sang firecracker related injury sa rehiyon dose ang Department of Health ukon DOH 12 halin Disyembre 21 tubtob Disyembre 27 subong nga tuig.
Suno kay DOH 12 Health Education and Promotion Officer Arjohn Gangoso ang nasambit nga numero ang manubo sang 64 porsyento kumparar sang nagligad nga tuig sa kapareho nga panahon.
Sa datos sang ahensya suno sa iya tatlo ang halin sa South Cotabato kag isa naman sa Saranggani Province.
Samtang ang klase sang palupok nga gingamit sang mga biktima ang boga, sparkler kag fountain.
Nakaangkon naman ang duha ka mga biktima sang eye injury kag duha naman ang nakaangkon sang paso nga lunsay mga lalaki kag direkta nga naggamit sang palupok.
Ginkumpirmar man ni Gangoso nga wala man sila sang narekord nga biktima sang stray bullet.
Ginpahayag ni Gangoso nga magapadayon ang ila nga monitoring sa mga firecracker related injury sa region 12 tubtob sa una nga semana sang Enero sa masunod nga tuig bilang kabahin sa pagpatuman naman sang ‘Iwas Paputok Campaign” sang nasambit nga ahensya.
Apela niya naman sa katawhan nga maghalong batok palupok agud malikawan ang disgrasya.
